ازبکستان کا 10 رکنی میڈیا وفد 7 روزہ دورے پر پاکستان پہنچ گیا

حکومتِ پاکستان کی خصوص دعوت پر ازبکستان کا 10 رکنی اعلیٰ سطحی میڈیا وفد 7 روزہ سرکاری دورے پر پاکستان پہنچ گیا ہے۔ اس وفد میں معروف ازبک ٹی وی شخصیات، ڈیجیٹل کانٹینٹ کریئیٹرز، یوٹیوبرز، انفلونسرز اور سوشل میڈیا کے ممتاز نمائندے شامل ہیں۔ اس دورے کا بنیادی مقصد پاکستان اور ازبکستان کے درمیان دوطرفہ تعلقات، میڈیا روابط، ثقافتی تبادلوں اور عوامی سطح پر روابط (People-to-People contacts) کو مزید گہرا اور مضبوط بنانا ہے۔ اپنے قیام کے دوران وفد سرکاری و نجی اداروں کے نمائندوں سے ملاقاتیں کرے گا اور پاکستان کے بدلتے ہوئے میڈیا منظرنامے اور سماجی و اقتصادی ترقی کا جائزہ لے گا۔

ازبک میڈیا وفد اپنے 7 روزہ دورے میں اسلام آباد کی معروف فیصل مسجد، مری، ٹیکسلا کی قدیم گندھارا تہذیب اور لاہور کے تاریخی و ثقافتی ورثے کا بھی تفصیلی دورہ کرے گا۔ دورے کا مقصد ازبکستان میں پاکستان کے مثبت تشخص، سیاحتی امکانات اور معاشی ترقی کو اجاگر کرنا ہے۔ ازبک میڈیا شخصیات اپنے ان تمام مشاہدات اور تجربات کو اپنے ڈیجیٹل اور سوشل میڈیا پلیٹ فارمز کے ذریعے ازبک عوام تک پہنچائیں گی، جس سے دونوں برادر ممالک کی میڈیا برادریوں کے درمیان تعاون اور اشتراکِ عمل کی نئی راہیں کھلنے کی توقع ہے۔