باب المندب کی بندش پوری دنیا کیلئے تباہ کن ہوگی: قطر کا اظہارِ تشویش

قطر نے بحیرہ احمر کی سیکیورٹی صورتِ حال اور باب المندب کی ممکنہ بندش پر شدید تشویش کا اظہار کرتے ہوئے خبردار کیا ہے کہ اس اہم ترین عالمی بحری راستے کی بندش پوری دنیا کے لیے انتہائی تباہ کن ثابت ہو گی۔ قطری وزارتِ خارجہ کی جانب سے جاری کردہ ایک اہم بیان میں کہا گیا ہے کہ عالمی برادری پہلے ہی آبنائے ہرمز کی بندش کے سنگین نتائج اور معاشی اثرات بھگت رہی ہے، ایسے میں باب المندب میں پیدا ہونے والی نئی صورتِ حال کو آبنائے ہرمز کے مسائل سے نہیں جوڑا جانا چاہیے۔

قطری حکام نے واضح کیا ہے کہ بحیرہ احمر کے جنوبی بحری راستے پر پیدا ہونے والی رکاوٹوں کے منفی اثرات عالمی معیشت اور رسد کے نظام پر پہلے ہی نظر آنا شروع ہو چکے ہیں۔ انہوں نے متنبہ کیا کہ اگر خطے میں کشیدگی مزید پھیلی اور دیگر اہم بین الاقوامی بحری گزرگاہیں بند ہوئیں تو اس سے عالمی سطح پر شدید ترین معاشی بحران، تجارتی تاخیر اور بے تحاشا مالی نقصان کا سامنا کرنا پڑے گا۔ قطر نے علاقائی کشیدگی کو کم کرنے اور بحری نقل و حمل کی آزادی برقرار رکھنے کی ضرورت پر زور دیا ہے۔