پٹرولیم مصنوعات پر لیوی ختم کی جائے، حکومت ہوش کے ناخن لے: شرجیل میمن

سندھ کے سینئر صوبائی وزیر شرجیل انعام میمن نے پٹرولیم مصنوعات کی قیمتوں میں مسلسل اضافے پر شدید ردِعمل دیتے ہوئے وفاقی حکومت سے فی لیٹر پٹرولیم لیوی کو فوری طور پر ختم کرنے کا مطالبہ کیا ہے۔ سندھ اسمبلی کے اجلاس میں اظہارِ خیال کرتے ہوئے انہوں نے کہا کہ وفاق اس وقت فی لیٹر پر 100 روپے سے زائد لیوی وصول کر رہا ہے، جبکہ پٹرول کی قیمت بڑھنے سے روزمرہ کی تمام اشیاء مہنگی ہو جاتی ہیں جس سے تنخواہ دار طبقہ اور عام عوام پس کر رہ گئے ہیں۔ شرجیل میمن نے واضح کیا کہ پاکستان پیپلزپارٹی اس معاملے پر عوام کے ساتھ کھڑی ہے اور وفاقی حکومت کو چاہیے کہ وہ ہوش کے ناخن لیتے ہوئے یہ لیوی ختم کرے۔

سینئر وزیر نے پی ٹی آئی کے رکن اسمبلی محمد اویس کی جانب سے پیش کی جانے والی پٹرولیم مصنوعات کی قیمتوں میں کمی کی قرارداد کی بھرپور تائید کی۔ اس موقع پر انہوں نے ایم کیو ایم کو بھی شدید تنقید کا نشانہ بنایا اور کہا کہ وفاقی حکومت کی اتحادی ہونے کے باوجود ایم کیو ایم اب خاموش ہے، حالانکہ 2008ء میں جب پیپلزپارٹی کی حکومت نے پٹرول میں محض ایک روپیہ بڑھایا تھا تو ایم کیو ایم نے حکومت چھوڑ دی تھی۔ شرجیل میمن کا کہنا تھا کہ اقتدار کے نشے میں 100 روپے اضافے پر بھی متحدہ کے رہنماؤں کو سانپ سونگھ گیا ہے اور وہ کابینہ کا حصہ بن کر حکومت کے مزے لے رہے ہیں۔