پٹرولیم لیوی کے خاتمے تک احتجاج جاری رہے گا: حافظ نعیم الرحمان

امیرِ جماعت اسلامی پاکستان حافظ نعیم الرحمان نے اعلان کیا ہے کہ پٹرولیم لیوی کے مکمل خاتمے تک عوام کا احتجاجی تحریک اور دھرنے بلا تعطل جاری رہیں گے۔ کراچی میں دھرنے کے شرکاء سے خطاب کرتے ہوئے حافظ نعیم الرحمان نے کہا کہ حکومت کو ہر صورت پٹرولیم لیوی کا فیصلہ واپس لینا پڑے گا کیونکہ ایک مخصوص مفاد پرست ٹولہ ملک کو دونوں ہاتھوں سے لوٹ رہا ہے۔ انہوں نے حکومت کو سخت خبردار کیا کہ اگر پٹرولیم لیوی اور ظالمانہ ٹیکسز کا بھتہ ختم نہ کیا گیا تو یہ احتجاجی تحریک اسلام آباد میں حکومت کے گھیراؤ تک پھیل جائے گی۔

اپنے آئندہ کے لائحہ عمل کا اعلان کرتے ہوئے حافظ نعیم الرحمان نے بتایا کہ کراچی میں تاریخی جلسے کے بعد لاہور، مردان اور پشاور میں بڑے عوامی جلسے کیے جائیں گے جس کے بعد اسلام آباد کی طرف پیش قدمی کی جائے گی۔ انہوں نے حکومت کی جانب سے متوقع لاک ڈاؤن کی افواہوں کو رد کرتے ہوئے کہا کہ کسی صورت لاک ڈاؤن نہیں چلنے دیا جائے گا، حکومت اپنی عیاشیاں کم کرے اور عوام پر معاشی بوجھ ڈالنا بند کرے۔ امیرِ جماعت اسلامی نے وزیراعظم سے سودی نظام کے فوری خاتمے کا بھی مطالبہ کیا اور کہا کہ سود معیشت کی تباہی کا سبب ہے، اس کے خاتمے سے ہی ملکی صنعتیں اور معاشی سرگرمیاں بحال ہو سکتی ہیں۔