برمنگھم ٹیسٹ کے ہیرو رضا اللہ وطن واپس پہنچ گئے، ایئرپورٹ پر شاندار استقبال

برمنگھم ٹیسٹ میچ میں شاندار باؤلنگ کا مظاہرہ کرنے والے مردان کے ہونہار اور نوجوان فاسٹ باؤلر رضا اللہ وطن واپس پہنچ گئے ہیں، جہاں اسلام آباد انٹرنیشنل ایئرپورٹ پر ان کے رشتہ داروں، دوستوں اور اہل علاقہ کی بڑی تعداد نے ان کا پرجوش اور پرگرم استقبال کیا۔ ایئرپورٹ پہنچنے پر رضا اللہ کو پھولوں کے ہار پہنائے گئے اور ‘پاکستان زندہ باد’ کے نعروں سے فضائیں گونج اٹھیں۔

ایئرپورٹ سے رضا اللہ کو ایک بڑے جلوس کی شکل میں ان کے آبائی گاؤں ‘منصب کلی’ لایا گیا، جہاں رکن صوبائی اسمبلی (ایم پی اے) افتخار علی مشوانی اور مقامی شہریوں نے ان کا شاندار استقبال کیا۔ ڈھول کی تھاپ اور روایتی رقص کے ساتھ رضا اللہ کو ان کے گھر پہنچایا گیا، جہاں ان کے اعزاز میں ایک خصوصی تقریب بھی منعقد کی گئی۔ اس موقع پر میڈیا اور تقریب سے خطاب کرتے ہوئے رضا اللہ کا کہنا تھا کہ برمنگھم میں ان کی کامیابی صرف ان کی ذات کی نہیں بلکہ پورے مردان اور پاکستان کی فتح ہے۔ انہوں نے عزم ظاہر کیا کہ وہ آئندہ بھی قومی ٹیم کی نمائندگی کرتے ہوئے اس سے بھی زیادہ بہترین کارکردگی کا مظاہرہ کرنے کی کوشش کریں گے۔