خیبرپختونخوا دو دن سے لاوارث، سہیل آفریدی سیر سپاٹے کر رہے ہیں: عظمیٰ بخاری

وزیر اطلاعات پنجاب عظمیٰ بخاری نے خیبرپختونخوا کی انتظامی صورتحال پر شدید تنقید کرتے ہوئے کہا ہے کہ صوبے میں ڈاکٹرز، میڈیکل اسٹورز اور اساتذہ ہڑتالیں کر رہے ہیں جبکہ خیبرپختونخوا کی قیادت اور کابینہ کے اراکین لاہور میں سیر سپاٹے کر رہے ہیں۔ اپنے ایک بیان میں عظمیٰ بخاری نے کہا کہ ڈیرہ اسماعیل خان میں ینگ ڈاکٹرز اور کے پی میں میڈیکل اسٹور ایسوسی ایشن کے احتجاج کے باعث سرکاری ہسپتالوں میں غریب مریض اور ان کے لواحقین دربدر ٹھوکریں کھانے پر مجبور ہیں، جبکہ گومل یونیورسٹی کا عملہ بھی اپنے مطالبات کے لیے سڑکوں پر ہے۔

انہوں نے کہا کہ خیبرپختونخوا پچھلے دو دنوں سے عملی طور پر لاوارث نظر آ رہا ہے۔ وزیر اطلاعات پنجاب نے طنز کرتے ہوئے کہا کہ کے پی کے وزراء اگر اپنی مرضی سے لاہور کے لکشمی چوک کے فٹ پاتھ پر بیٹھیں اور پھر اسے اپنے صوبے کے خلاف سازش کہیں تو یہ مضحکہ خیز ہے۔ انہوں نے کہا کہ خیبرپختونخوا کی قیادت نے لاہور کی ترقی دیکھ لی ہو تو واپس جا کر اپنے صوبے کی خبر لے، جہاں نااہلی، نالائقی اور کرپشن کا راج ہے۔ عظمیٰ بخاری نے مزید کہا کہ صوبائی حکومت کو اپنے عوام کے مسائل سے زیادہ اڈیالہ جیل کے قیدی کی فکر لاحق ہے۔