افغان میڈیکل طلبہ کی پاکستان میں تعلیم جاری رکھنے کی درخواست پر فیصلہ جاری

بلوچستان ہائی کورٹ نے پاکستان میں زیرِ تعلیم افغان میڈیکل طلبہ کی تعلیمی اور تربیتی سرگرمیاں جاری رکھنے سے متعلق دائر کردہ درخواست پر اپنا تفصیلی فیصلہ جاری کرتے ہوئے درخواست کو مسترد کر دیا ہے۔ کیس کی سماعت جسٹس محمد عامر نواز رانا اور جسٹس عبدالقیوم لہڑی پر مشتمل دو رکنی بینچ نے کی۔ عدالتِ عالیہ نے اپنے فیصلہ میں واضح کیا کہ کسی بھی غیر ملکی شہری کو پاکستان میں تعلیم حاصل کرنے یا پیشہ ورانہ تربیت کا کوئی غیر محدود یا مطلق حق حاصل نہیں ہے، کیونکہ امیگریشن، ملک بدری اور قومی سلامتی جیسے اہم امور کا حتمی اختیار صرف اور صرف ریاست اور حکومت کے پاس ہے۔

عدالت نے اپنے حکم نامے میں مزید مؤقف اپنایا کہ اگرچہ افغان شہریوں کو انسانی حدود کے اندر رکھتے ہوئے وقار، انسانی سلوک اور قانونی تحفظات کا پورا حق حاصل ہے، لیکن ان قانونی و اخلاقی تحفظات کے باوجود انہیں ملک میں دائمی قیام یا بلاجواز تعلیم کا بنیادی حق نہیں دیا جا سکتا۔ بلوچستان ہائی کورٹ نے متاثرہ افغان میڈیکل طلبہ کو ہدایت جاری کی کہ وہ اپنے تحفظات اور درپیش انتظامی مسائل کے ازالے کے لیے اسلام آباد میں واقع افغان سفارتخانے سے باقاعدہ رجوع کریں۔