پمز ایم سی ایچ سے نومولود چوری کی کوشش ناکام، دو خواتین اور لڑکی گرفتار

وفاقی دارالحکومت کے سب سے بڑے سرکاری ہسپتال پاکستان انسٹی ٹیوٹ آف میڈیکل سائنسز (پمز) کے مدر اینڈ چائلڈ ہسپتال (MCH) سے نومولود بچے کے اغوا کی کوشش ناکام بناتے ہوئے دو خواتین اور ایک نوعمر لڑکی کو گرفتار کر لیا گیا ہے۔ پمز سیکیورٹی ذرائع کے مطابق ملزمان ایم سی ایچ کے جنرل وارڈ کے بیڈ نمبر 8 سے نومولود کو مبینہ طور پر اٹھا کر ہسپتال سے باہر منتقل کرنے کی کوشش کر رہے تھے۔ تینوں مشکوک افراد ہسپتال کے تین اندرونی سیکیورٹی چیکپوائنٹس عبور کرتے ہوئے مرکزی خارجی گیٹ تک پہنچنے میں کامیاب ہو گئے تھے۔

ہسپتال حکام کا کہنا ہے کہ دونوں خواتین کے ہمراہ موجود نوعمر لڑکی نے بچے کو اٹھا رکھا تھا۔ خارجی گیٹ پر تعینات سیکیورٹی گارڈ نے مشکوک نقل و حرکت اور نومولود کو دیکھ کر بروقت ایکشن لیا اور تینوں کو موقع پر ہی روک کر بچے کو بحفاظت بازیاب کروا لیا۔ سیکیورٹی اہلکاروں نے ملزمات کو فوری طور پر پولیس کے حوالے کر دیا ہے جبکہ واقعے کے بعد ہسپتال کے داخلی و خارجی راستوں پر سیکیورٹی کے انتظامات مزید سخت کر دیے گئے ہیں۔