حکومت ریلیف کا ڈرامہ بند اور پٹرولیم لیوی کا بھتہ ختم کرے: حافظ نعیم

امیرِ جماعت اسلامی پاکستان حافظ نعیم الرحمان نے حکومت کی جانب سے حالیہ ریلیف اقدامات کو ‘ڈرامہ’ قرار دیتے ہوئے پٹرولیم لیوی کا فوری خاتمہ اور اسٹیٹ بینک کا پالیسی ریٹ کم کرنے کا مطالبہ کر دیا ہے۔ لاہور میں ایک ہنگامی پریس کانفرنس سے خطاب کرتے ہوئے انہوں نے اعلان کیا کہ جماعت اسلامی اپنے مطالبات کی منظوری کے لیے 20 ستمبر کو اسلام آباد کی طرف مارچ کرے گی، جبکہ مختلف شہروں میں جاری دھرنے بھی کسی صورت ختم نہیں کیے جائیں گے۔ ان کا کہنا تھا کہ گزشتہ سال حکومت نے 1,567 ارب روپے لیوی کی مد میں جمع کیے، جو کہ غریب عوام سے فی لیٹر 135 روپے بھتہ وصول کرنے کے مترادف ہے۔

حافظ نعیم الرحمان نے اسٹیٹ بینک کی جانب سے شرح سود (پالیسی ریٹ) کو برقرار رکھنے پر شدید افسوس کا اظہار کرتے ہوئے کہا کہ اس سے ملک پر قرضوں کا بوجھ مزید بڑھے گا۔ انہوں نے حکومت پر تنقید کی کہ 25 ارب روپے کا مبینہ ریلیف دینے کا دعویٰ کر کے عوام کو ذلیل کیا جا رہا ہے اور اس کا اشتہار دینے پر کروڑوں روپے ضائع کر دیے گئے ہیں۔ امیرِ جماعت اسلامی نے مطالبہ کیا کہ حکومت دکھاوے کے پیکج جاری کرنے کے بجائے عالمی مارکیٹ کے متناسب فائدے عوام تک پہنچائے اور پٹرولیم لیوی کا بھتہ فوری طور پر ختم کرے۔