پٹرولیم قیمتوں میں ریلیف، حکومت اور جماعت اسلامی میں اہم ملاقات

جماعت اسلامی کے اعلیٰ سطحی وفد نے لیاقت بلوچ کی قیادت میں وفاقی وزراء علی پرویز ملک، اعظم نذیر تارڑ اور بلال اظہر کیانی سے اہم ملاقات کی، جس کے دوران وفد کو پٹرولیم سیکٹر اور ایندھن کی عالمی و ملکی فراہمی پر تفصیلی بریفنگ دی گئی۔ وفاقی وزیر پٹرولیم علی پرویز ملک نے بتایا کہ حکومت نے حالیہ عالمی بحران کے باوجود ملک بھر میں ایندھن کی بلاتعطل فراہمی یقینی بنائی ہے اور موٹر سائیکلوں، چنگچی رکشوں اور چھوٹی گاڑیوں کے لیے ٹارگٹڈ سبسڈی دی جا رہی ہے تاکہ مستحق طبقات کو مستحکم ریلیف مل سکے۔ اس کے علاوہ مقامی ریفائنریوں کی اپ گریڈیشن سے یورو فائیو ایندھن کی پیداوار اور پٹرول و ڈیزل کی پیداواری صلاحیت میں اضافہ ہوگا جس سے درآمدی مصنوعات پر انحصار کم کرنے میں مدد ملے گی۔

ملاقات میں وفاق اللّٰہ وزراء اعظم نذیر تارڑ اور بلال اظہر کیانی نے کہا کہ عوام کو ریلیف فراہم کرنا اور ٹیکس بیس بڑھا کر براہ راست ٹیکسوں کا فروغ حکومت کی اولین ترجیح ہے۔ جماعت اسلامی نے حکومت کے فیول ریلیف اقدامات کا خیرمقدم کیا، تاہم لیاقت بلوچ نے پٹرولیم لیوی میں واضح کمی اور بنیادی مسائل کے مستقل حل پر زور دیا۔ لیاقت بلوچ کا کہنا تھا کہ عالمی منڈی میں تیل کی قیمتوں کے اتار چڑھاؤ کے باوجود پٹرولیم مصنوعات کی قیمتیں مزید کم کی جا سکتی ہیں۔ انہوں نے خبردار کیا کہ حکومت پر عوام کا شدید دباؤ واضح ہے اور اب یہ وزیراعظم پر ہے کہ وہ کون سا راستہ اختیار کرتے ہیں۔ وزراء نے جماعت اسلامی کی تمام سفارشات وزیراعظم تک پہنچانے کی یقین دہانی کرائی۔