جنوبی افریقہ کے خلاف ہوم سیریز کے لیے پاکستان ویمنز انڈر 19 اسکواڈ کا اعلان؛ فضا فیاض کپتان مقرر

جنوبی افریقہ کے خلاف ہوم سیریز کے لیے پاکستان ویمنز انڈر 19 کرکٹ ٹیم کے 17 رکنی اسکواڈ کا اعلان کر دیا گیا ہے، جس کی قیادت فضا فیاض کریں گی۔ دونوں ٹیموں کے درمیان 5 ٹی ٹوئنٹی میچوں پر مشتمل یہ تاریخی سیریز 14 سے 24 جولائی تک نیشنل بینک اسٹیڈیم کراچی میں فلڈ لائٹس کے نیچے رات 8 بجے کھیلی جائے گی۔ مہمان ٹیم اپنے پہلے دورۂ پاکستان کے لیے 10 جولائی کو کراچی پہنچے گی، جس کے بعد دونوں ٹیمیں 11 سے 13 جولائی تک ٹریننگ سیشنز میں حصہ لیں گی۔ گزشتہ سال بنگلہ دیش کو ہرا کر آنے والے کامیاب اسکواڈ کی 9 کھلاڑیوں بشمول کپتان فضا فیاض، اقصیٰ حبیب، عریشہ انصاری، کومل خان، میمونہ خالد، راحمہ سید، روائل فرحان، روزینہ اکرم اور ذوفشاں ایاز کو اس اسکواڈ میں برقرار رکھا گیا ہے۔ سیریز کی تیاریوں کے سلسلے میں قومی کھلاڑیوں نے کراچی میں فٹنس اور اسکلز کیمپ میں بھرپور ٹریننگ کی ہے۔ اسکواڈ کی دیگر کھلاڑیوں میں الزوہہ حماد، بریرہ سیف، ہادیہ مینا، ماہ نور، ماہم نزاکت، ماہنور زیب، شہر بانو اور زینب خانم شامل ہیں۔