پاکستان سٹاک مارکیٹ میں تیزی، ایک لاکھ 76 ہزار پوائنٹس کی حد بحال

پاکستان اسٹاک مارکیٹ میں مثبت رجحان کے باعث ہنڈرڈ انڈیکس ایک بار پھر ایک لاکھ 76 ہزار پوائنٹس کی حد بحال کرنے میں کامیاب ہو گیا ہے۔ کاروباری ہفتے کے پانچویں اور آخری روز کے آغاز پر اسٹاک ایکسچینج میں شدید تیزی دیکھی گئی، جہاں انڈیکس 1,300 سے زائد پوائنٹس کے اضافے کے ساتھ 1,76,920 پوائنٹس کی بلند ترین سطح پر پہنچ گیا۔ اگرچہ ٹریڈنگ کے دوران مارکیٹ کی تیزی میں معمولی سستی دیکھی گئی، تاہم کاروباری روز کے اختتام پر 100-انڈیکس 546 پوائنٹس کے اضافے کے ساتھ 1,76,094 کی سطح پر بند ہوا۔ واضح رہے کہ گزشتہ کاروباری روز انڈیکس 1,75,547 پوائنٹس کی سطح پر بند ہوا تھا۔