حکومت کا 2027ء تک سود سے پاک مالی نظام کی تیاری کا فیصلہ, مالیاتی استحکام برقرار رکھتے ہوئے تبدیلی کا عمل مکمل کیا جائے گا، وزارت خزانہ

پاکستان میں سال 2027ء کے بعد کے فنانشل سسٹم کی حکمتِ عملی پر باقاعدہ کام کا آغاز کر دیا گیا ہے۔ وزارتِ خزانہ کے مطابق حکومت نے 2027ء تک ملک میں سود سے پاک مالیاتی نظام تیار کرنے کا حتمی فیصلہ کیا ہے، جس کے نفاذ کے لیے حکومت، اسٹیٹ بینک آف پاکستان (SBP) اور سیکیورٹیز اینڈ ایکسچینج کمیشن آف پاکستان (SECP) مل کر کام کریں گے۔

وزارتِ خزانہ کی رپورٹ کے مطابق، سال 2025ء تک پاکستان کے فنانشل سیکٹر کے اثاثوں کی مجموعی مالیت 79 ہزار 780 ارب روپے تک پہنچ چکی ہے، جو جی ڈی پی (GDP) کے لحاظ سے 68.5 فیصد بنتی ہے۔ ان اثاثوں میں سب سے بڑا حصہ بینکوں کا ہے جن کے پاس 63 ہزار 231 ارب روپے موجود ہیں، جبکہ نان بینکنگ فنانشل اداروں کے اثاثوں کا حجم 6 ہزار 844 ارب روپے ہے۔ اس بڑے مالیاتی ڈھانچے کو مرحلہ وار اسلامی مالیاتی نظام کی طرف منتقل کیا جائے گا۔

منصوبے کے تحت ملک میں سکوک کے باقاعدہ اجرا کے لیے ایک نیا نظام متعارف کرایا جا رہا ہے اور شارٹ ٹرم سکوک کے اجرا پر کام تیز کر دیا گیا ہے۔ شریعت کے مطابق مالیاتی نظام کو قانونی تحفظ دینے کے لیے وفاقی اور صوبائی قوانین میں ضروری ترامیم کی تیاری کا پلان بھی بنا لیا گیا ہے۔ اس کے علاوہ بینکوں کے آئی ٹی (IT) سسٹم کو اسلامی بینکاری کے تقاضوں کے مطابق ڈھالا جائے گا اور عملے کی تربیت کے لیے خصوصی پروگرامز کا انعقاد کیا جائے گا۔

رپورٹ میں واضح کیا گیا ہے کہ 2027ء کے بعد تمام نئی سرکاری فنانسنگ لازمی طور پر شریعت کے مطابق ہوگی، جبکہ روایتی قرضوں کو بھی مرحلہ وار اسلامی فنانسنگ میں تبدیل کیا جائے گا۔ اس بڑی تبدیلی کے دوران اسٹیٹ بینک کی مانیٹری پالیسی کو بھی شریعت کے مطابق بنایا جائے گا اور مالیاتی استحکام کو برقرار رکھتے ہوئے اس پورے منتقلی کے عمل کو مکمل کیا جائے گا۔