ایران اور امریکا کے درمیان جنگ میں آبنائے ہرمز پر کنٹرول اہم ترین محاذ بن گیا: میڈیا رپورٹ

امریکی نشریاتی ادارے سی این این کی رپورٹ کے مطابق خلیج فارس کی اہم آبی گزرگاہ آبنائے ہرمز پر امریکی بحری افواج اپنا کنٹرول اور برتری بتدریج مضبوط کر رہی ہیں، جبکہ دوسری جانب ایران کی اس علاقے پر گرفت میں کمی دیکھی جا رہی ہے۔

بحری جہازوں کی نقل و حرکت پر نظر رکھنے والے ادارے کپلر (Kpler) کے ڈیٹا سے معلوم ہوا ہے کہ گزشتہ دو ہفتوں کے دوران آبنائے ہرمز سے گزرنے والے 80 فیصد سے زائد تجارتی و بحری جہازوں نے عمانی راستے کا استعمال کیا ہے، جو اقوام متحدہ کا منظور شدہ بین الاقوامی بحری راستہ ہے۔ ایران اس راستے کی مخالفت کرتا رہا ہے اور اس نے اس علاقے سے گزرنے والے بعض جہازوں کو نشانہ بھی بنایا تھا۔

تاہم، ایرانی خطرات کے باوجود حالیہ دنوں میں زیادہ تر بحری جہازوں نے ایرانی مطالبات کو نظرانداز کرتے ہوئے امریکی بحری افواج کے سیکیورٹی کور کی یقین دہانی پر عمانی راستے کا انتخاب کرنا شروع کر دیا ہے، جو ایک ماہ قبل کی صورتحال کے مقابلے میں ایک واضح تبدیلی ہے۔