دوبارہ فوجی ایکشن سے سفارتکاری کا وقت آگیا، دباؤ بڑھا کر امریکا رعایتیں حاصل نہیں کر سکتا: ایران

ایرانی پارلیمنٹ کے سپیکر محمد باقر قالیباف نے امریکہ کو سخت خبردار کرتے ہوئے کہا ہے کہ ایک بار پھر فوجی کارروائی کے ذریعے سفارتکاری کی تکمیل کا وقت آ گیا ہے اور ایران پر بڑھائے جانے والے دباؤ کے ذریعے امریکہ وہ رعایتیں ہرگز حاصل نہیں کر سکتا جو اسلام آباد مفاہمتی یادداشت کا حصہ نہیں تھیں۔

اپنے تندوتیز بیان میں باقر قالیباف نے امریکی انتظامیہ کے نمائندوں کو آڑے ہاتھوں لیتے ہوئے کہا کہ ہیگسیتھ اور بیسنٹ اپنی حد سے تجاوز کر کے بات کر رہے ہیں۔ انہوں نے طنز کرتے ہوئے کہا کہ “مسخروں کی ٹیم کوئی کرشمہ نہیں دکھا سکتی، اس انتظار کو ختم کر دینا چاہیے کہ کوئی جادوگر ٹوپی سے خرگوش نکال کر اس بحران کو راتوں رات ختم کر دے گا۔”

آبنائے ہرمز کی بندش پر ایرانی موقف کو دہراتے ہوئے سپیکر پارلیمنٹ نے واضح کیا کہ جب تک ایران کی بحری ناکہ بندی ختم نہیں کی جاتی، آبنائے ہرمز کو نہیں کھولا جائے گا۔ انہوں نے مزید شرائط عائد کرتے ہوئے کہا کہ ایرانی تیل پر عائد پابندیاں اٹھانے، منجمد اثاثے واگزار کرنے اور ایران کے خلاف تمام فوجی آپریشنز کی مکمل بندش تک یہ سٹریٹیجک آبی گزرگاہ بند رہے گی۔

محمد باقر قالیباف کا مزید کہنا تھا کہ عالمی سطح پر وعدوں کی مسلسل خلاف ورزیوں کا اب صرف الفاظ سے نہیں بلکہ عملی ردعمل سے جواب دیا جائے گا اور فوجی صلاحیتوں کے بھرپور استعمال کے بعد ہی سفارتی حل تلاش کیا جائے گا۔