پاکستان نے پہلی بار 4,722 ارب روپے کا قرض قبل از وقت ادا کر دیا

وزارت خزانہ نے اعلان کیا ہے کہ پاکستان نے ملکی تاریخ میں پہلی بار 4,722 ارب روپے کا قرضہ مقررہ مدت سے پہلے ادا کر کے ایک نیا ریکارڈ قائم کر دیا ہے۔ وزارت خزانہ کی جانب سے جاری کردہ اعلامیے کے مطابق آخری 279 ارب روپے کے بائی بیک (Buy-back) کے بعد قبل از وقت قرض کی مجموعی ادائیگی 4,722 ارب روپے تک پہنچ گئی ہے۔ مالی سال 2025-26 میں 2.9 کھرب روپے کا قرض مقررہ مدت سے پہلے ریٹائر کیا گیا، جو مالی سال 2024-25 کے مقابلے میں 62 فیصد زیادہ ہے۔ اس قبل از وقت ریٹائر کیے گئے قرض میں 51 فیصد اسٹیٹ بینک کا قرض اور 49 فیصد مارکیٹ کا قرض شامل ہے۔

وزارت خزانہ کا کہنا ہے کہ اس تاریخی اقدام سے ملک کے ری فنانسنگ اور رول اوور رسک میں نمایاں کمی واقع ہوئی ہے، جبکہ سودی اخراجات اور قومی خزانے پر بوجھ بھی کم ہونے کی توقع ہے۔ حکومتی اقدامات کی بدولت ملک میں لیکویڈیٹی اور کیش فلو مینجمنٹ میں بہتری آئی ہے، جس سے سرمایہ کاروں کے اعتماد اور مجموعی مالیاتی استحکام کو تقویت ملی ہے۔ وزارت خزانہ نے مزید بتایا کہ اوسط قرض کی میعاد 2.7 سال سے بڑھ کر اب 3.8 سال سے زائد ہو گئی ہے، جبکہ پاکستان کا قرضوں کا جی ڈی پی سے تناسب جو کہ پہلے تقریباً 75 فیصد تھا، اب کم ہو کر 68.5 فیصد تک آ گیا ہے۔ حکومت کے مطابق، پاکستان اب قلیل مدتی قرضوں کے چکر سے نکل کر طویل مدتی معاشی و مالیاتی استحکام کی شاہراہ پر گامزن ہو رہا ہے