ڈیرہ اسماعیل خان میں بس کھائی میں گرنے سے 16 افراد جاں بحق،متعدد زخمی

خیبرپختونخوا کے ضلع ڈیرہ اسماعیل خان اور بلوچستان کے سرحدی علاقے دانہ سر میں ایک افسوسناک ٹریفک حادثے میں مسافر بس گہری کھائی میں گر گئی، جس کے نتیجے میں 16 افراد جاں بحق اور متعدد زخمی ہو گئے۔

بلوچستان کے ضلع شیرانی کی انتظامیہ کے مطابق، حادثے کی اطلاع ملتے ہی ریسکیو ٹیمیں اور ایمبولینسز فوری طور پر جائے وقوعہ پر پہنچ گئیں۔ امدادی اہلکاروں نے مقامی لوگوں کے ساتھ مل کر بس سے لاشوں اور زخمیوں کو نکالنے کا کام شروع کیا۔

حکام کا کہنا ہے کہ زخمیوں کو فوری طبی امداد کی فراہمی اور انہیں قریبی ہسپتالوں میں منتقل کرنے کا عمل تیزی سے جاری ہے۔ ضلع انتظامیہ جائے وقوعہ پر موجود ہے اور امدادی سرگرمیوں کی مسلسل نگرانی کر رہی ہے۔ خدشہ ظاہر کیا جا رہا ہے کہ بعض زخمیوں کی حالت تشویشناک ہونے کے باعث ہلاکتوں میں اضافہ ہو سکتا ہے۔