امریکی رکن کانگریس کا اسرائیل پر فوری اسلحہ پابندی عائد کرنے کا مطالبہ

امریکی کانگریس کی سرکردہ مسلم رکن راشدہ طلیب نے غزہ میں جاری اسرائیلی جارحیت کی شدید الفاظ میں مذمت کرتے ہوئے اپنی ہی حکومت سے اسرائیل پر فوری اور مکمل اسلحہ پابندی عائد کرنے کا مطالبہ کیا ہے۔

سوشل میڈیا پر جاری اپنے ایک بیان میں فلسطینی نژاد امریکی رکنِ کانگریس راشدہ طلیب نے کہا کہ غزہ میں اسرائیل کی جانب سے جاری فلسطینیوں کی نسل کشی کو ایک ہزار دن مکمل ہو گئے ہیں۔ انہوں نے افسوس کا اظہار کرتے ہوئے کہا کہ آج تک معصوم فلسطینی اس نسل پرست نظام کے ہاتھوں وحشیانہ قتل عام کا شکار ہو رہے ہیں، اور سب سے زیادہ قابلِ مذمت بات یہ ہے کہ ہماری اپنی (امریکی) حکومت اس ظلم کی پشت پناہی اور مکمل حمایت کر رہی ہے۔

راشدہ طلیب نے امریکی انتظامیہ پر زور دیا کہ اب وقت آ گیا ہے کہ اسرائیل کو ہتھیاروں کی سپلائی فوری طور پر بند کی جائے اور اس انسانیت سوز قتلِ عام کے ذمہ داران کو بین الاقوامی انصاف کے کٹہرے میں لایا جائے۔ ان کا یہ سخت بیان ایک ایسے وقت میں سامنے آیا ہے جب غزہ کی سنگین صورتحال اور امریکی پالیسیوں پر خود امریکہ کے اندر اور بین الاقوامی سطح پر شدید سیاسی اختلافات اور احتجاجی لہر میں اضافہ دیکھا جا رہا ہے۔