محسن نقوی کا پاک سعودیہ برادرانہ تعلقات مزید مضبوط بنانے کے عزم کا اعادہ

وفاقی وزیر داخلہ محسن نقوی نے مکہ ریجن کے قائم مقام گورنر شہزادہ سعود بن مشعل بن عبدالعزیز سے ایک اہم ملاقات کی ہے۔ اس موقع پر گورنر جدہ شہزادہ سعود بن عبداللہ بن جلوی، گورنر طائف شہزادہ سعود بن نہار بن سعود اور شاہی خاندان کی دیگر معزز شخصیات بھی موجود تھیں۔

ملاقات کے دوران وفاقی وزیر داخلہ محسن نقوی نے پاک سعودیہ تاریخی و برادرانہ تعلقات کو مزید مضبوط بنانے کے عزم کا اعادہ کیا۔ انہوں نے عمرہ اور حج کے لیے کیے گئے بہترین انتظامات پر قائم مقام گورنر مکہ ریجن کا خصوصی طور پر شکریہ ادا کیا۔ سعودی گورنر نے بھی پاکستان کے ساتھ تعلقات کو انتہائی اہمیت دینے اور ہر ممکن تعاون کا یقین دلایا۔

ملاقات میں کھیلوں کے شعبے بالخصوص کرکٹ کے فروغ پر بھی تفصیلی بات چیت ہوئی۔ قائم مقام گورنر مکہ ریجن نے پاکستان کرکٹ بورڈ (پی سی بی) اور سعودی عرب کرکٹ فیڈریشن کے مابین ہونے والے حالیہ معاہدے کو خوش آئند قرار دیا۔

انہوں نے جدہ میں پہلے بین الاقوامی معیار کے کرکٹ سٹیڈیم کی تعمیر کے فیصلے کو سراہتے ہوئے کہا کہ مکہ ریجن میں اس سٹیڈیم کی تعمیر کے لیے پی سی بی کے ساتھ ہر ممکن اور بھرپور تعاون کیا جائے گا۔ تجزیہ کاروں کے مطابق اس اقدام سے نہ صرف سعودی عرب میں کرکٹ کو فروغ ملے گا بلکہ دونوں ممالک کے درمیان کھیلوں اور ثقافتی شعبوں میں روابط مزید گہرے ہوں گے