اپوزیشن کا 27 ستمبر کا احتجاج اور لانگ مارچ برقرار رکھنے کا فیصلہ

محمود خان اچکزئی کی زیرِ صدارت منعقدہ اپوزیشن کی مشترکہ پارلیمانی پارٹی کے اجلاس میں 27 ستمبر کا احتجاج اور لانگ مارچ برقرار رکھنے کا حتمی فیصلہ کیا گیا ہے۔ اجلاس میں بانی پی ٹی آئی کی صحت پر شدید تشویش کا اظہار کرتے ہوئے حکومت پر اس معاملے میں ڈرامہ رچانے کا الزام عائد کیا گیا اور واضح کیا گیا کہ ان کی صحت پر کوئی سمجھوتہ نہیں کیا جائے گا۔ اس کے علاوہ اپوزیشن نے سپریم کورٹ کے احکامات پر عملدرآمد نہ ہونے کو توہینِ عدالت قرار دیتے ہوئے اس کے خلاف عدالتِ عظمیٰ سے رجوع کرنے کا بھی فیصلہ کیا ہے۔ اعلامیے کے مطابق گرینڈ اپوزیشن الائنس کے قیام کی تائید کرتے ہوئے مولانا فضل الرحمان سمیت دیگر اپوزیشن جماعتوں کو اس میں شمولیت کی دعوت دی گئی ہے تاکہ آئین و قانون کی حکمرانی کے لیے مشترکہ جدوجہد کو آگے بڑھایا جا سکے۔