کم جونگ اُن کو قتل کیا گیا تو فوری جوہری حملہ ہوگا،  شمالی کوریا کا نیا آئین

شمالی کوریا نے اپنے جوہری قوانین میں ایک نہایت غیر معمولی اور خطرناک تبدیلی کرتے ہوئے یہ شق شامل کر دی ہے کہ اگر ملک کے سربراہ کم جونگ اُن قتل کر دیے گئے یا کسی حملے کے باعث حکمرانی کے قابل نہ رہے تو ملک فوری طور پر خودکار جوہری حملہ کرے گا۔

عالمی خبر رساں اداروں کے مطابق اس فیصلے کے بعد دنیا بھر میں تشویش کی لہر دوڑ گئی ہے۔ برطانوی اخبار کی رپورٹ میں بتایا گیا ہے کہ آئین میں یہ ترمیم 22 مارچ کو منظور کی گئی تھی تاہم اسے پہلی بار اب منظرِ عام پر لایا گیا ہے۔

رپورٹ کے مطابق نئی شق جوہری پالیسی قانون کے آرٹیکل 3 میں شامل کی گئی ہے، جس میں کہا گیا ہے کہ اگر دشمن قوتوں کے حملے کے نتیجے میں ریاستی جوہری کمان اور کنٹرول نظام خطرے میں پڑتا ہے تو فوری اور خودکار جوہری حملہ کیا جائے گا۔

رپورٹ میں یہ بھی کہا گیا ہے کہ شمالی کوریا کو خدشہ ہے کہ ایران میں امریکی اور اسرائیلی کارروائیوں کے بعد پیدا ہونے والی صورتحال کی طرح ان کی اعلیٰ قیادت کو بھی مستقبل میں خطرات لاحق ہو سکتے ہیں۔

شمالی کوریا میں خفیہ معلومات حاصل کرنا اور اعلیٰ قیادت تک رسائی حاصل کرنا انتہائی دشوار سمجھا جاتا ہے کیونکہ ملک کی سرحدیں تقریباً مکمل طور پر بند ہیں اور غیر ملکی افراد کی سخت نگرانی کی جاتی ہے۔

دوسری جانب شمالی کوریا نے جنوبی کوریا کی سرحد کے قریب نئے طرز کے 155 ملی میٹر خودکار توپ خانے کی تعیناتی کا بھی اعلان کیا ہے، جس کی مار 60 کلومیٹر سے زائد بتائی جا رہی ہے۔

سرکاری ذرائع کے مطابق کم جونگ اُن نے نئے ہتھیار کی تیاری کا معائنہ کیا اور کہا کہ اس سے شمالی کوریا کی زمینی جنگی صلاحیتوں میں نمایاں اضافہ ہوگا۔