سابق کپتان ندا ڈار کو سی ایم پنجاب چیمپئن لیگ میں ذمہ داریاں مل گئیں

پاکستان ویمنز کرکٹ ٹیم کی سابق کپتان ندا ڈار کو “سی ایم پنجاب چیمپئنز لیگ” میں خواتین کرکٹ کی اہم ذمہ داریاں سونپ دی گئی ہیں۔

سی ایم پنجاب چیمپئنز لیگ کے حوالے سے گفتگو کرتے ہوئے ندا ڈار نے کہا کہ وزیر اعلیٰ پنجاب مریم نواز کی خصوصی دلچسپی کی بدولت صوبے میں خواتین کرکٹ کے فروغ کا ایک نیا دور شروع ہونے جا رہا ہے۔ انہوں نے پنجاب حکومت کے اس اقدام کو سراہتے ہوئے کہا کہ حکومتِ پنجاب خواتین کرکٹرز کو اپنی صلاحیتیں دکھانے کے لیے ایک بہترین اور جاندار پلیٹ فارم فراہم کر رہی ہے۔

سابق کپتان کا مزید کہنا تھا کہ اس چیمپئنز لیگ کے انعقاد سے نئی اور ٹیلنٹڈ کھلاڑیوں کو آگے آنے کا بھرپور موقع ملے گا، اور اس باوقار لیگ کے لیے بہترین ٹیمیں تشکیل دی جا رہی ہیں۔ انہوں نے گرلز اور بوائز دونوں کے لیے اس لیگ کے انعقاد پر وزیر اعلیٰ مریم نواز کا شکریہ ادا کیا۔

واضح رہے کہ پنجاب حکومت کی جانب سے اس چیمپئنز لیگ کا مقصد نچلی سطح پر ٹیلنٹ کو تلاش کرنا اور انہیں قومی سطح پر ابھرنے کے مواقع فراہم کرنا ہے۔