نیویارک کرائے داروں کی بڑی جیت، سٹی بورڈ نے مئیر مامدانی کی ‘کرایہ منجمد کرنے’ کی تاریخی تجویز منظور کر لی

نیویارک سٹی کے رینٹ گائیڈ لائنز بورڈ (RGB) نے ایک تاریخی فیصلے میں شہر کے تقریباً 10 لاکھ رینٹ اسٹیبلائزڈ (حکومتی نگرانی میں چلنے والے) اپارٹمنٹس کے کرائے منجمد کرنے کی منظوری دے دی ہے۔ یہ فیصلہ نیویارک کے مئیر زوہران مامدانی (Zohran Mamdani) کی انتخابی مہم کا ایک بنیادی وعدہ تھا، جس کی منظوری کو ان کی انتظامیہ اور پروگریسو تحریک کی ایک بہت بڑی سیاسی کامیابی قرار دیا جا رہا ہے۔

رینٹ گائیڈ لائنز بورڈ کے اجلاس کے دوران اس تجویز کو 7-1 کی واضح اکثریت سے منظور کیا گیا۔ اس نئے فیصلے کے تحت 1 اکتوبر 2026 سے 30 ستمبر 2027 کے درمیان شروع ہونے والے ایک سال اور دو سال کے نئے لیز (معاہدوں) پر کرائے میں کوئی اضافہ نہیں کیا جائے گا۔ نیویارک کی تاریخ میں یہ پہلا موقع ہے کہ جب بورڈ نے ایک سال اور دو سال، دونوں طرز کے معاہدوں پر بیک وقت کرایہ منجمد (0% اضافہ) کرنے کا فیصلہ کیا ہے۔ مئیر زوہران مامدانی نے اس فیصلے کا خیرمقدم کرتے ہوئے اسے نیویارک کے شہریوں اور محنت کش طبقے کی “تاریخی فتح” قرار دیا۔ دوسری جانب، رئیل اسٹیٹ انڈسٹری اور مکان مالکان کی تنظیموں نے اس فیصلے پر سخت تشویش کا اظہار کیا ہے۔ ان کا موقف ہے کہ انشورنس، ٹیکس اور مرمت کے اخراجات میں مسلسل اضافے کے باوجود کرایہ نہ بڑھانے سے عمارتوں کی حالت خراب ہوگی اور کئی مکان مالکان دیوالیہ ہونے کے دہانے پر پہنچ سکتے ہیں۔