میٹا کا 16 سے کم عمر آسٹریلوی نوجوانوں کے اکاؤنٹس بند کرنے کا اعلان

آسٹریلیا میں 10 دسمبر سے 16 سے کم عمر کے نوجوانوں پر فیس بک، انسٹاگرام اور ٹک ٹاک پر اکاؤنٹس بنانے کی پابندی ہو گی جبکہ خلاف ورزی پر بھاری جرمانہ عائد کرنا پڑے گا، میٹا اس سے پہلے ہی نوجوانوں کے اکاؤنٹس بند کرنے کا سلسلہ شروع کر دے گی۔

میٹا کمپنی نے اپنے بیان میں کہا ہے کہ آج سے میٹا 13 سے 15 سال کی عمر کے صارفین کو پیغام بھیجنا شروع کر دے گا کہ انہیں انسٹاگرام، تھریڈز اور فیس بک تک رسائی حاصل نہیں رہے گی، میٹا 4 دسمبر سے 16 سال سے کم عمر صارفین کے نئے اکاؤنٹس بلاک کرے گا اور موجودہ اکاؤنٹس کو بند کرنا شروع کر دے گا جبکہ 10 دسمبر تک تمام ایسے اکاؤنٹس سوشل میڈیا پلیٹ فارمز سے ہٹا دیے جائیں گے۔

میٹا کا کہنا ہے کہ 16 سال کی عمر کو پہنچنے پر صارفین اپنے اکاؤنٹس تک رسائی حاصل کر سکیں گے اور ان کو اپنے اکاؤنٹس اسی حالت میں واپس ملیں گے جیسے وہ چھوڑ کر گئے تھے۔

واضح رہے کہ سوشل میڈیا کمپنیاں آسٹریلوی حکومت کے قانون کو مبہم، مسائل سے بھرپور اور جلد بازی میں کیا گیا اقدام قرار دے چکی ہیں۔میٹا نے ایک مرتبہ پھر اپنے خدشات کا اظہار کرتے ہوئے کہا کہ آسٹریلوی حکومت کی طرح ہمارا بھی یہی مقصد ہے کہ آن لائن تجربات کو عمر کے مطابق اور محفوظ بنایا جائے لیکن نوجوانوں کو اپنے دوستوں اور کمیونیٹی سے علیحدہ کرنا اس کا جواب نہیں ہے۔