ملک میں سیکیورٹی اداروں کے کردار کو واضح کیا جائے،: محمود خان اچکزئی

پختونخوا ملی عوامی پارٹی کے سربراہ اور سینیئر سیاستدان محمود خان اچکزئی نے آل پارٹیز کانفرنس سے خطاب کرتے ہوئے بلوچستان اور ملک کی مجموعی سیکیورٹی صورتحال پر کھل کر اپنے تحفظات کا اظہار کیا ہے۔ انہوں نے واضح کیا کہ جب تک ملک میں سیکیورٹی اداروں اور افواج کے آئینی کردار کو واضح نہیں کیا جاتا، یہ سنگین مسئلہ حل نہیں ہو سکتا اور نہ ہی حالات میں کوئی بہتری آئے گی۔

محمود خان اچکزئی نے سیکیورٹی اور انٹیلیجنس اداروں کی کارکردگی پر سوال اٹھاتے ہوئے کہا کہ “دنیا بھر میں جاسوسی ادارے ہوتے ہیں اور وہ اپنی ریاستوں کے آنکھ اور کان کا کام کرتے ہیں۔ ہمارے ادارے اتنے کمزور نہیں ہیں کہ انہیں یہ معلوم نہ ہو سکے کہ ملک میں کیا ہو رہا ہے اور کون کیا کر رہا ہے۔” انہوں نے سخت سوال اٹھایا کہ جو ادارے گندے پانی سے سوئی ڈھونڈ نکالنے کی صلاحیت رکھتے ہیں، وہ باجوڑ سے لے کر خیبر اور کوئٹہ تک امن و امان قائم کرنے میں کیوں ناکام ہیں؟

تاریخی پس منظر کا ذکر کرتے ہوئے محمود خان اچکزئی نے کہا کہ پشتون اور بلوچ عوام مغل شہنشاہ اکبر اعظم کے دور سے اپنے حقوق اور دھرتی کے تحفظ کے لیے لڑتے آ رہے ہیں۔ انہوں نے انتہائی افسوس کا اظہار کرتے ہوئے کہا کہ آج حالات اس نہج پر پہنچا دیے گئے ہیں کہ پشتونوں کی روایتی پگڑی اور داڑھی کو (پروفائلنگ کے ذریعے) دہشت گردی کی علامت بنا کر پیش کیا جا رہا ہے، جو کہ سراسر ناانصافی ہے۔

 سربراہ پختونخوا میپ نے واضح کیا کہ معاشرے میں بڑھتی ہوئی بے انصافی سے ہی نفرتیں جنم لیتی ہیں اور جب انصاف کے راستے بند کر دیے جائیں تو بات آخر کار دہشت گردی تک جا پہنچتی ہے۔ انہوں نے مذہبی اور تاریخی حوالوں سے بات کرتے ہوئے کہا کہ دنیا میں لاکھوں بے گناہ لوگوں، انبیاء اور نیک اشخاص کو شہید کیا گیا، حتیٰ کہ حضرت موسیٰ علیہ السلام کی تحریک بھی بنیادی طور پر فرعون کے جبر کے خلاف آزادی کی تحریک تھی۔

انہوں نے مقتدر حلقوں کے رویے پر کڑی تنقید کرتے ہوئے کہا کہ یہاں المیہ یہ ہے کہ جائز مطالبات کے لیے پرامن احتجاج کرنے والوں سے بات تک کرنا گوارا نہیں کیا جاتا۔ انہوں نے مطالبہ کیا کہ طاقت کا استعمال ترک کر کے عوام کو ان کے سیاسی اور آئینی حقوق دیے جائیں۔