مریم نواز سے ہائی کمشنر ماریشس کی ملاقات، مختلف شعبوں میں تعاون بڑھانے پر اتفاق

وزیراعلیٰ پنجاب مریم نواز شریف سے جمہوریہ ماریشس کے ہائی کمشنر ایچ ای منسو کرمباکس نے ملاقات کی، جس میں دونوں رہنماؤں نے مختلف شعبوں میں تعاون کو فروغ دینے پر اتفاق کیا۔ ملاقات میں بزنس ٹو بزنس روابط، تجارتی وفود، نمائشوں، تعلیم، سیاحت، زراعت اور عوامی تبادلوں کی اہمیت پر زور دیا گیا۔

مریم نواز شریف نے ہائی کمشنر کے لیے نیک خواہشات کا اظہار کرتے ہوئے کہا کہ پنجاب ماریشس کے ساتھ تجارتی اور معاشی تعلقات مضبوط کرنے، چاول، ٹیکسٹائل اور فارماسیوٹیکل مصنوعات کی برآمدات بڑھانے، اور بلیو اکانومی میں سرمایہ کاری کے لیے پُرعزم ہے۔ انہوں نے نوجوانوں کی ترقی، منشیات کے خلاف اقدامات، اور سکل ڈویلپمنٹ پروگرام کی کامیابیوں کو بھی اجاگر کیا۔

ہائی کمشنر منسو کرمباکس نے کہا کہ پاکستان میں سیاحتی سرگرمیوں کے فروغ سے ماریشس اور پاکستان کے درمیان تعلقات مزید مستحکم ہوں گے اور پاکستان کا مثبت تشخص عالمی سطح پر اجاگر ہوگا۔ ملاقات میں حلال فوڈ، ٹیکنالوجی اور ہیومن ریسورس کے شعبوں میں تعاون بڑھانے پر بھی اتفاق کیا گیا۔