9مئی مقدمات کا تحریری فیصلہ، محمود کو 33، یاسمین اور عمر چیمہ کو 10، 10 سال قید

انسداد دہشت گردی عدالت لاہور نے نو مئی کے دو مقدمات کا تحریری فیصلہ جاری کر دیا۔ عدالت نے میاں محمود الرشید کو مجموعی طور پر 33 سال قید اور 6 لاکھ روپے جرمانے کی سزا سنائی، جبکہ ڈاکٹر یاسمین راشد، اعجاز چوہدری اور عمر سرفراز چیمہ کو دس دس سال قید کی سزا دی گئی۔

فیصلے کے مطابق محمود الرشید کو مختلف سیکشنز کے تحت الگ الگ سزائیں سنائی گئیں۔ جرم ثابت نہ ہونے پر 23 ملزمان کو بری کر دیا گیا، جبکہ رہنماؤں سمیت سات ملزمان کو قصوروار ٹھہرا کر قید کی سزا سنائی گئی۔

عدالت نے قرار دیا کہ پراسکیوشن کے مطابق ڈاکٹر یاسمین راشد سمیت چار رہنماؤں نے ملک میں جلاؤ گھیراؤ کے لیے عوام میں انتشار پھیلایا۔ پراسکیوشن کی جانب سے واٹس ایپ پیغامات، 70 سوشل میڈیا اکاؤنٹس کی تفصیلات اور فرانزک رپورٹس پیش کی گئیں۔ فیصلے میں کہا گیا کہ جے آئی ٹی نے ملزمان کو قصوروار قرار دیا اور رپورٹ کو کسی فورم پر چیلنج نہیں کیا گیا، جبکہ پراسکیوشن اپنا کیس ثابت کرنے میں کامیاب رہی۔