منی لانڈرنگ کیس: وزیراعظم اور حمزہ کی بریت کے خلاف درخواست خارج

لاہور: لاہور ہائیکورٹ نے 16 ارب روپے کے مبینہ منی لانڈرنگ کیس میں وزیراعظم شہباز شریف اور حمزہ شہباز کی بریت کے خلاف دائر درخواست کو ناقابلِ سماعت قرار دیتے ہوئے مسترد کر دیا ہے۔ چیف جسٹس لاہور ہائیکورٹ، جسٹس عالیہ نیلم نے کیس کی سماعت کی، جو ایڈووکیٹ وشال احمد شاکر کی جانب سے سینیئر قانون دان عامر سعید راں کی وساطت سے دائر کی گئی تھی۔

دورانِ سماعت درخواست گزار کے وکیل نے موقف اختیار کیا کہ اسپیشل سینٹرل کورٹ کے جج نے فردِ جرم عائد ہونے سے قبل ہی ملزمان کو بری کر کے غیر قانونی ریلیف دیا، جبکہ پراسیکیوشن کو 100 کے قریب گواہ پیش کرنے کا موقع بھی نہیں دیا گیا۔ وکیل نے استدعا کی کہ ٹرائل کورٹ کے فیصلے کو کالعدم قرار دے کر مقدمہ دوبارہ چلایا جائے۔

تاہم، چیف جسٹس عالیہ نیلم نے وکیل کے دلائل پر سخت استفسار کرتے ہوئے پوچھا کہ “آپ اس مقدمے میں متاثرہ فریق کیسے ہیں؟” انہوں نے ریمارکس دیے کہ یہ عوامی مفاد کا کیس نہیں ہے اور کوئی بھی شخص برسوں بعد آ کر عدالتی فیصلوں کو اس طرح چیلنج نہیں کر سکتا۔ عدالت نے رجسٹرار آفس کے اس اعتراض کو درست قرار دیا کہ درخواست گزار کا اس کیس سے کوئی براہِ راست تعلق نہیں ہے، جس کے بعد درخواست خارج کر دی گئی۔