امریکا نے ایران میں مزید حملے کیے تو جنگ کا رخ بدل سکتا ہے، مشیر ایرانی سپریم لیڈر

ایرانی سپریم لیڈر کے مشیر محسن رضائی نے امریکا کو سخت وارننگ دیتے ہوئے کہا ہے کہ اگر ایران پر امریکی حملوں کا سلسلہ جاری رہا تو جنگ کا رخ بدل سکتا ہے اور ایران دفاعی کے بجائے مکمل جارحانہ حکمت عملی اختیار کر سکتا ہے۔ اس حوالے سے پاسدارانِ انقلاب کی نیول کمان نے بھی انتباہ جاری کیا ہے کہ چند روز مزید حملے ہونے کی صورت میں مکمل جارحانہ آپریشن شروع کر دیا جائے گا، جبکہ گزشتہ 24 گھنٹوں میں آبنائے ہرمز سے 8 امریکی جہاز گزرے ہیں جن کی نقل و حرکت پر گہری نظر رکھی جا رہی ہے۔ پاسدارانِ انقلاب نے اپنے بیان میں کہا ہے کہ امریکی فوج انتظار کرے اور دیکھے، کیونکہ ایرانی مسلح افواج جلد ہی آپریشن شروع کرنے والی ہیں۔ دوسری جانب، ایران کی پارلیمنٹ کی قومی سلامتی کمیٹی کے سربراہ ابراہیم عزیزی نے بھی عزم کا اظہار کرتے ہوئے کہا ہے کہ دشمن جان لے، ایرانی قوم کو شکست دینا ممکن نہیں اور بے گناہ شہریوں کا خون کبھی رائیگاں نہیں جائے گا