ایران کے مختلف شہروں میں دھماکے، خارگ جزیرے کے قریب آئل ٹینکر پر بھی حملہ: ایرانی میڈیا

ایران کے مختلف شہروں میں شدید دھماکوں کی آوازیں سنی گئی ہیں، جبکہ امریکی فورسز نے جزیرہ خارگ کے قریب ایک ایرانی آئل ٹینکر کو بھی نشانہ بنایا ہے۔ ایرانی خبر رساں ایجنسی کے مطابق، امریکی فوج نے جنوبی شہر اہواز پر میزائلوں سے حملہ کیا ہے، جبکہ وسطی ایران کے شہر یزد میں بھی 5 زوردار دھماکے سنے گئے ہیں۔ ایرانی حکام کے مطابق، خارگ جزیرے کے قریب کھڑے خالی ایرانی آئل ٹینکر ’بیلما این آئی 22‘ پر دو روز میں یہ دوسرا امریکی حملہ ہے۔ بوشہر کے ڈپٹی گورنر نے تصدیق کی ہے کہ اس آئل ٹینکر کو دو روز قبل بھی نشانہ بنایا گیا تھا اور آج یہ دوبارہ امریکی میزائلوں کی زد میں آیا ہے۔