شکست خوردہ مودی شدید دباؤ کا شکار، پراپیگنڈے سے مسئلہ حل نہیں ہوگا: خواجہ آصف

وزیر دفاع خواجہ آصف نے کہا ہے کہ گزشتہ سال پاکستان کے ساتھ جنگ میں شکست کے بعد بھارتی وزیراعظم نریندر مودی اندرونِ ملک اور عالمی سطح پر اپنی گرتی ہوئی ساکھ کے باعث شدید دباؤ کا شکار ہیں۔

سماجی رابطے کے پلیٹ فارم ایکس (ٹویٹر) پر جاری اپنے ایک بیان میں خواجہ آصف کا کہنا تھا کہ بھارت کی جانب سے ان کے خلاف ذاتی حملے کرنے یا انہیں ذہنی طور پر غیر مستحکم قرار دینے سے کوئی مسئلہ حل نہیں ہوگا۔ انہوں نے واضح کیا کہ بھارت کی اس تشہیری مہم کا مقصد نریندر مودی کو ایک عالمی مدبر رہنما کے طور پر پیش کرنا تھا، تاہم اس کے برعکس عالمی سطح پر ان کی ساکھ ایک شعبدہ باز رہنما کے طور پر ابھری ہے۔

خواجہ آصف نے برطانوی اخبار کی رپورٹ کا حوالہ دیتے ہوئے کہا کہ ‘دی گارڈین’ کی ایک رپورٹ میں بھی نریندر مودی کو ملنے والے اعزازات کی ساکھ اور شفافیت پر سنگین سوالات اٹھائے گئے ہیں۔ وزیر دفاع کا مزید کہنا تھا کہ بیرونِ ملک سے مصنوعی تعریف و توصیف حاصل کرنے کی مودی کی کوششیں دراصل بھارت کے اندر ان کی تیزی سے کمزور ہوتی ہوئی سیاسی ساکھ کو سہارا دینے کی ایک ناکام کوشش ہیں۔