کراچی: چیف جسٹس سندھ ہائی کورٹ سے بار کابینہ اور امیدواران کی ملاقات انتخابات جلد کرانے پر اتفاق

کراچی: کراچی بار ایسوسی ایشن کے انتخابات ملتوی ہونے کے معاملے پر کراچی بار کی کابینہ اور انتخابی امیدواران نے چیف جسٹس سندھ ہائی کورٹ سے ملاقات کی، جس میں انتخابات کے جلد انعقاد پر تفصیلی تبادلۂ خیال کیا گیا۔

صدر کراچی بار ایسوسی ایشن عامر وڑائچ کے مطابق ملاقات کے دوران چیف جسٹس سندھ ہائی کورٹ نے انتخابات کے لیے تین مجوزہ تاریخیں تحریری طور پر طلب کی ہیں۔ انہوں نے بتایا کہ امیدواران سے مشاورت کے بعد 20، 22 اور 23 دسمبر کی تاریخیں تجویز کی گئی ہیں۔

عامر وڑائچ نے کہا کہ چیف جسٹس سے ملاقات انتہائی مثبت رہی اور انہوں نے یقین دہانی کرائی ہے کہ کمیٹی سے مشاورت کے بعد جلد از جلد انتخابات کے حوالے سے فیصلہ کیا جائے گا۔

صدر کراچی بار کا کہنا تھا کہ ہم چاہتے ہیں کہ بار کے انتخابات جلد از جلد ہوں، جمہوری عمل کا تسلسل ضروری ہے، کوئی بھی امیدوار کامیاب ہو لیکن اصل جیت جمہوریت کی ہونی چاہیے۔

کراچی بار ایسوسی ایشن کے وکلا نے بھی اس بات پر زور دیا کہ انتخابات کا بروقت انعقاد وکلا برادری اور ادارہ جاتی استحکام کے لیے ناگزیر ہے۔