جاپان کے سابق اولمپک سلور میڈلسٹ سائیکلسٹ ریس کے دوران حادثے میں جاں بحق

جاپان کے نامور سائیکلسٹ اور سابق اولمپک سلور میڈلسٹ توشیاکی فوشیمی ماتسوساکا کیئرن ریس کے دوران پیش آنے والے ایک سنسنی خیز اور ہولناک حادثے کے نتیجے میں 50 برس کی عمر میں انتقال کر گئے ہیں۔ میڈیا رپورٹس کے مطابق فوشیمی گزشتہ روز ریس کے آخری مرحلے کے دوران سائیکل چلاتے ہوئے اچانک اپنا توازن کھو بیٹھے اور تیز رفتاری کے باعث حفاظتی باڑ سے جا ٹکرائے، جس کے نتیجے میں انہیں شدید چوٹیں آئیں۔ حادثے کے فوراً بعد انہیں تشویشناک حالت میں ہسپتال منتقل کیا گیا جہاں ڈاکٹروں نے ان کی ریڑھ کی ہڈی کی سنگین چوٹوں کا علاج کرنے کی بھرپور کوشش کی، تاہم وہ جانبر نہ ہو سکے۔ جاپان کیئرن ایسوسی ایشن نے ان کی موت کی تصدیق کرتے ہوئے بتایا کہ ایتھنز 2004ء اولمپکس کے سلور میڈلسٹ توشیاکی فوشیمی اتوار کی صبح مقامی وقت کے مطابق 10:15 بجے ہسپتال میں دم توڑ گئے۔ فوشیمی کی اچانک وفات کی خبر سامنے آتے ہی دنیائے کھیل میں سوگ کی فضا چھا گئی ہے اور سوشل میڈیا پر ان کے مداحوں، ساتھی کھلاڑیوں اور اہم شخصیات کی جانب سے گہرے دکھ کا اظہار کیا جا رہا ہے۔