جنگ کے بعد حالات بدل چکے ہیں، امریکا کو موجودہ حقائق تسلیم کرنا ہوں گے، باقر قالیباف

ایران کی پارلیمنٹ کے اسپیکر محمد باقر قالیباف نے کہا ہے کہ اسرائیل اور امریکا کی ایران کے خلاف حالیہ جنگ کے بعد خطے کی صورتحال یکسر بدل چکی ہے اور اب امریکا کو بین الاقوامی تجارت کے حوالے سے موجودہ حقائق کو تسلیم کرنا ہوگا۔

ایرانی میڈیا کے مطابق ازبکستان کی پارلیمنٹ کے اسپیکر سے ایک اہم ملاقات کے دوران محمد باقر قالیباف نے گفتگو کرتے ہوئے کہا کہ جنگ کے بعد اب حالات ماضی کے مقابلے میں کافی بہتر ہوئے ہیں۔ انہوں نے زور دیا کہ حالیہ تزویراتی پیش رفت نے امریکا کو خطے کے نئے حقائق قبول کرنے پر مجبور کر دیا ہے۔ موجودہ ماحول دونوں ممالک (ایران اور ازبکستان) کے درمیان تجارتی تعلقات کو مزید وسعت دینے کے لیے سازگار ہے اور امید ہے کہ مستقبل میں ایران پر عائد پابندیاں اٹھانے کی بنیاد بھی تیار ہو جائے گی۔

ایرانی اسپیکر کا مزید کہنا تھا کہ خلیج فارس اور آبنائے ہرمز میں ایران اور عمان کے مشترکہ سیکورٹی و انتظامی انتظام اور خطے میں امریکی بحری سرگرمیوں میں واضح کمی آئی ہے۔ اس نئی صورتحال کے باعث خطے میں تجارتی سامان کی نقل و حمل (ٹرانزٹ تعاون) کو فروغ دینے کے لیے پہلے سے کہیں بہتر اور محفوظ مواقع پیدا ہوں گے، جس سے پورے خطے کی معیشت مستفید ہو سکتی ہے۔