بھارتی فوج کی جانب سے کالعدم عوامی ایکشن کمیٹی کی حمایت، گٹھ جوڑ دوبارہ بے نقاب

آزاد کشمیر کے امن و استحکام اور کشمیری عوام کے حقوق کے خلاف سرگرم کالعدم عوامی ایکشن کمیٹی اور بھارت کا مبینہ گٹھ جوڑ ایک بار پھر کھل کر سامنے آ گیا ہے۔ ذرائع کے مطابق، غیور کشمیری عوام کی جانب سے کالعدم کمیٹی کے بیانیے کو مسترد کیے جانے کے بعد بھارتی میڈیا اور قابض بھارتی فوج نے ایل او سی کے قریب کیرن سیکٹر میں 13 اور 14 اگست (یومِ آزادی پاکستان) کے موقع پر بڑی سکرینوں پر کمیٹی کے حق میں ویڈیوز نشر کیں۔ دفاعی اور سیاسی تجزیہ کاروں کا کہنا ہے کہ آزاد کشمیر کے عوام کی جانب سے پاکستان کا یومِ آزادی جوش و خروش سے منائے جانے پر بھارت شدید بوکھلاہٹ کا شکار ہے اور سرحد پر ایسی اشتعال انگیز سرگرمیاں پاکستان مخالف جذبات ابھارنے کی ایک ناکام کوشش ہیں۔