حزب اللہ کمانڈر کی شہادت کے بعد امریکا سے مذاکرات معطل کر دیے: باقر قالیباف

ایران کی پارلیمنٹ کے سپیکر اور امریکا کے ساتھ چیف مذاکرات کار محمد باقر قالیباف نے انکشاف کیا ہے کہ جنوبی بیروت میں اسرائیلی حملے میں حزب اللہ کے انٹیلی جنس سربراہ کی شہادت کے بعد امریکا کے ساتھ تمام مذاکرات معطل کر دیے گئے تھے۔ ایرانی میڈیا کے مطابق، قالیباف نے بتایا کہ انہوں نے اسی وقت سخت جواب دینے کا اعلان کیا جس پر امریکی صدر ڈونلڈ ٹرمپ نے بحری ناکہ بندی ختم کرنے کی ٹوئٹ کی، تاہم ٹوئٹ میں آبنائے ہرمز سے متعلق غلط دعویٰ شامل کرنے پر ایران کے دباؤ کے بعد ٹرمپ کو 58 منٹ میں اپنی ٹوئٹ ترمیم کرنا پڑی۔ رپورٹس کے مطابق یہ بحری ناکہ بندی دوبارہ شروع کر دی گئی ہے، جبکہ ٹرمپ کی جانب سے آبنائے ہرمز کو امریکی سرزمین کا حصہ قرار دینے کے بیان پر ایرانی نائب وزیر خارجہ نے شدید ردعمل دیتے ہوئے واضح کیا ہے کہ آبنائے ہرمز ہمیشہ ایرانی ہی رہے گی۔