گوجرانوالہ ٹیچنگ ہسپتال کی چوری ادویات گودام سے برآمد، 4 افسران و اہلکار معطل

گوجرانوالہ ٹیچنگ ہسپتال سے سرکاری ادویات کی چوری اور غیر قانونی گودام سے برآمدگی کا انکشاف ہونے پر محکمہ سپیشلائزڈ ہیلتھ کیئر اینڈ میڈیکل ایجوکیشن نے فوری ایکشن لیتے ہوئے چار افسران و اہلکاروں کو معطل کر دیا ہے۔ معطل ہونے والوں میں ڈاکٹر شازیہ افضل (گریڈ 19)، ایک فارماسسٹ (گریڈ 17)، سٹور کیپر اور وارڈ کلینر شامل ہیں جنہیں پیڈا ایکٹ کے تحت معطل کر کے محکمہ میں رپورٹ کرنے کی ہدایت کی گئی ہے۔ ڈرگ کنٹرول ٹیم کی جانب سے غیر قانونی گودام پر چھاپے کے بعد سامنے آنے والے اس واقعے کی تحقیقات کے لیے 4 رکنی فیکٹ فائنڈنگ کمیٹی تشکیل دی گئی ہے، جسے 24 گھنٹوں کے اندر غفلت اور ملی بھگت کا تعین کر کے رپورٹ جمع کرانے کی ہدایت کی گئی ہے۔