آزاد کشمیر الیکشن: ایل اے 16 میں مسلم لیگ (ن)، ایل اے 15 میں پیپلز پارٹی کامیاب

آزاد کشمیر کے ضلع باغ کے دو حلقوں میں دوبارہ پولنگ کے بعد غیر حتمی نتائج سامنے آ گئے ہیں، جس میں ایک نشست پاکستان پیپلز پارٹی اور ایک پاکستان مسلم لیگ (ن) کے حصے میں آئی ہے۔ حلقہ ایل اے 15 باغ 2 کے 9 پولنگ سٹیشنز پر دوبارہ گنتی کے بعد پیپلز پارٹی کے امیدوار سردار ضیا القمر نے اپنے قریب ترین حریف مسلم لیگ (ن) کے راجا مشتاق منہاس کو 1900 ووٹوں سے شکست دے کر کامیابی حاصل کی۔ دوسری جانب حلقہ ایل اے 16 باغ 3 کے 14 پولنگ سٹیشنز پر دوبارہ پولنگ میں مسلم لیگ (ن) کے سردار میر اکبر خان 20 ہزار 793 ووٹ لے کر کامیاب قرار پائے جبکہ پی پی پی کے سردار قمر الزمان دوسرے نمبر پر رہے۔ علاوہ ازیں الیکشن کمیشن نے ایل اے 14 غربی باغ سے ساجد اقبال اور ایل اے 17 حویلی سے فیصل ممتاز راٹھور کی کامیابی کے نوٹیفکیشن جاری کر دیے ہیں۔