نام نہاد ناکہ بندی کے بعد جلد آپ 4 سے 5 ڈالر والے پٹرول کو یاد کریں گے: ایران

ایرانی پارلیمنٹ کے اسپیکر باقر قالیباف نے امریکی صدر ڈونلڈ ٹرمپ کی جانب سے آبنائے ہرمز اور ایرانی بندرگاہوں کی ناکہ بندی کے بیان پر سخت ردعمل دیتے ہوئے عالمی معیشت کے لیے سنگین خطرے کی گھنٹی بجا دی ہے۔ انہوں نے طنزیہ انداز میں امریکہ کو خبردار کیا کہ “نام نہاد ناکہ بندی کے بعد جلد ہی آپ 4 سے 5 ڈالر والے پیٹرول کو یاد کیا کریں گے،” جس کا واضح اشارہ ناکہ بندی کی صورت میں تیل کی قیمتوں میں ہوش ربا اضافے کی جانب تھا۔ انہوں نے واشنگٹن کو متنبہ کیا کہ وہ ایران کے عزم کو دوبارہ آزمانے کی کوشش نہ کرے۔

باقر قالیباف نے دوٹوک الفاظ میں کہا کہ کسی بھی غلطی کی صورت میں امریکہ کو پہلے سے بڑا سبق سکھایا جائے گا، اور امریکی دھمکیوں کا ایرانی عوام پر کوئی اثر نہیں ہوتا۔ انہوں نے واضح پیغام دیتے ہوئے کہا، “اگر آپ جنگ کریں گے تو ہم بھی جنگ کریں گے، لیکن اگر آپ منطق کے ساتھ آگے آئیں گے تو ہم بھی منطق کے ساتھ بات کریں گے۔” ان کا یہ بیان اس وقت سامنے آیا ہے جب اسلام آباد میں جاری مذاکرات میں تعطل اور امریکی ناکہ بندی کے اعلانات نے خطے میں جنگ کے بادل گہرے کر دیے ہیں۔

سیاسی مبصرین باقر قالیباف کے اس بیان کو عالمی توانائی کی منڈیوں کے لیے ایک کھلی دھمکی قرار دے رہے ہیں، کیونکہ آبنائے ہرمز سے عالمی تیل کی رسد کا ایک بڑا حصہ گزرتا ہے۔ ایرانی اسپیکر کے اس جارحانہ بیان کے بعد عالمی منڈی میں خام تیل کی قیمتوں میں مزید عدم استحکام کا خدشہ پیدا ہو گیا ہے، جبکہ اسلام آباد میں جاری امن کوششوں کو بھی شدید دھچکا لگنے کا اندیشہ ظاہر کیا جا رہا ہے۔