وزیراعظم کا بلوچستان سے پیش کیے گئے حب الوطنی نغمے پر فنکاروں کو خراجِ تحیسن

وزیراعظم پاکستان شہباز شریف نے یومِ آزادی کی آمد کے موقع پر بلوچستان کے فنکاروں کی جانب سے پیش کیے گئے خوبصورت اور حب الوطنی سے بھرپور نغمے کو بے حد سراہتے ہوئے اس کاوش میں شامل تمام افراد کو خراجِ تحسین پیش کیا ہے۔ سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے بیان میں وزیراعظم نے کہا کہ جیسے جیسے یومِ آزادی قریب آ رہا ہے، بلوچستان سے پیش کیے جانے والے اس شاندار نغمے کو دیکھ کر ان کا دل فخر سے بھر گیا ہے۔

شہباز شریف نے نغمے کے گلوکاروں، فنکاروں، پروڈیوسرز اور اس کی تیاری میں حصہ لینے والے ہر فرد کا تہہ دل سے شکریہ ادا کرتے ہوئے ان کی دلی قدر دانی کی۔ وزیراعظم کا کہنا تھا کہ تمام متعلقہ افراد نے اپنے بہترین فن اور محنت کے ذریعے پاکستان سے محبت کے جذبے کو نہایت خوبصورتی سے اجاگر کیا ہے۔ انہوں نے بلوچستان کی فنکارانہ صلاحیتوں اور تخلیقی کاوشوں کو زبردست الفاظ میں سراہا اور اپنے پیغام کا اختتام “پاکستان زندہ باد” کے نعرے سے کیا۔