روسی اولمپک کمیٹی پر اکتوبر 2023 سے عائد معطلی عارضی طور پر ختم

بین الاقوامی اولمپک کمیٹی (آئی او سی) نے روسی اولمپک کمیٹی پر اکتوبر 2023ء سے عائد معطلی کو عارضی طور پر ختم کرنے کا اعلان کر دیا ہے۔

آئی او سی کے مطابق، یہ فیصلہ اس لیے کیا گیا ہے کیونکہ روسی اولمپک کمیٹی نے یوکرین کے زیرِ اختیار علاقوں کی اسپورٹس تنظیموں کی آزاد حیثیت کو باضابطہ طور پر تسلیم کر لیا ہے۔ اس فیصلے کے بعد لاس اینجلس 2028ء اولمپکس کے کوالیفائنگ مرحلے کے آغاز پر روسی کھلاڑیوں کی بین الاقوامی کھیلوں میں واپسی کی راہ ہموار ہو گئی ہے، تاہم ان کے لیے سخت اینٹی ڈوپنگ شرائط برقرار رہیں گی۔

اولمپک کمیٹی نے واضح کیا ہے کہ روسی کھلاڑیوں کی باقاعدہ واپسی سے قبل ان کے متعدد ڈوپ ٹیسٹ کیے جائیں گے اور ان کے لیے انٹرنیشنل ٹیسٹنگ ایجنسی کے کڑے نگرانی پروگرام کا حصہ بننا لازمی ہو گا۔

آئی او سی کا مزید کہنا ہے کہ روس کے یوکرین پر حملے کے خلاف ان کا اصولی مؤقف تبدیل نہیں ہوا ہے اور یوکرین کے ساتھ یکجہتی کا سلسلہ برقرار رہے گا۔ کمیٹی نے واضح کیا کہ روس میں بین الاقوامی مقابلوں کے انعقاد، روسی پرچم کے استعمال اور قومی ترانے سے متعلق حتمی فیصلہ متعلقہ عالمی اسپورٹس فیڈریشنز خود کریں گی۔ آئی او سی روسی اولمپک کمیٹی کی سرگرمیوں کی مسلسل نگرانی کرے گی اور کسی بھی قسم کی خلاف ورزی کی صورت میں دوبارہ معطلی کی کارروائی کی جا سکتی ہے۔