بھارت نے اپنی تاریخ کا سب سے بھاری سیٹلائٹ لانچ کر دیا

بھارت کی خلائی ایجنسی نے اب تک کا سب سے بھاری پے لوڈ خلا میں روانہ کیا ہے، جس پر وزیر اعظم نریندر مودی نے اسے خلائی شعبے کے لیے ایک اہم پیش رفت قرار دیا۔

ایل وی ایم تھری ایم سکس راکٹ کے ذریعے امریکا میں تیار کردہ اے ایس ٹی اسپیس موبائل کمیونی کیشن سیٹلائٹ کو نچلے زمینی مدار میں پہنچایا گیا۔ انڈین اسپیس ریسرچ آرگنائزیشن (اسرو) کے مطابق یہ بھارتی سرزمین سے لانچ کیا جانے والا اب تک کا سب سے بھاری پے لوڈ ہے، جس کا وزن 6 ہزار 100 کلوگرام ہے۔

یہ لانچ بھارت کے کم لاگت مگر بلند عزائم پر مبنی خلائی پروگرام کے لیے بڑی کامیابی ہے، جس کے تحت آئندہ برسوں میں بغیر انسان کے مدار میں مشن اور انسانی خلائی پروازوں کا منصوبہ شامل ہے۔ راکٹ کے ترمیم شدہ ورژن کے ذریعے یہ سیٹلائٹ بھیجا گیا، جسے بھارت مستقبل کے خلائی مشنز میں استعمال کرے گا۔

بھارت تیزی سے پھیلتے ہوئے کمرشل سیٹلائٹ بزنس میں بڑا حصہ حاصل کرنے کی کوشش کر رہا ہے، جہاں فون، انٹرنیٹ اور دیگر کمپنیاں جدید اور وسیع کمیونی کیشن سہولیات کی طلب میں ہیں۔ بھارت کا کہنا ہے کہ 2027 میں پہلی انسانی خلائی پرواز سے قبل بغیر انسان کے مدار میں مشن بھیجے گا، اور 2040 تک ایک خلاباز کو چاند پر بھیجنے کا ارادہ رکھتا ہے۔