تیل فروخت کا ایرانی لائسنس منسوخ، عالمی منڈی میں خام تیل کی قیمتوں میں نمایاں اضافہ

امریکی محکمہ خزانہ کی جانب سے ایرانی تیل کی محدود فروخت کی اجازت دینے والے 21 جون کے جنرل لائسنس کو منسوخ کیے جانے کے بعد عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے۔

غیر ملکی خبر رساں ادارے کے مطابق، کاروباری سرگرمیوں کے اختتام پر برینٹ خام تیل کی قیمت میں 1.87 ڈالر فی بیرل کا اضافہ ہوا، جس کے بعد اس کی نئی قیمت 76.03 ڈالر فی بیرل کی سطح پر پہنچ گئی۔

دوسری جانب، ایران پر حالیہ امریکی فوجی حملوں اور بڑھتی ہوئی سفارتی کشیدگی کے باعث امریکی خام تیل (WTI) کی قیمت میں بھی 3 فیصد سے زائد کا بڑا اضافہ دیکھنے میں آیا ہے، جس کے بعد وہ 72.65 ڈالر فی بیرل تک پہنچ گئی ہے۔ معاشی ماہرین کا کہنا ہے کہ مشرقِ وسطیٰ کی حالیہ صورتحال اور سپلائی کی ممکنہ معطلی کے خدشات کے باعث عالمی توانائی کی مارکیٹ شدید دباؤ کا شکار ہے۔