پاسداران انقلاب کا امریکی حملوں کا تباہ کن جواب دینے کا اعلان

ایرانی پاسدارانِ انقلاب اور اعلیٰ مشترکہ فوجی کمان نے جنوبی ایران پر امریکی حملوں کی شدید ترین الفاظ میں مذمت کرتے ہوئے انہیں کھلی جارحیت قرار دیا ہے اور واشنگٹن کو تباہ کن جواب دینے کا اعلان کیا ہے۔

ایران کے ‘خاتم الانبیا سینٹرل ہیڈ کوارٹرز’ سے جاری ایک اہم بیان میں کہا گیا ہے کہ یہ حملے ایک ایسے نازک وقت پر کیے گئے جب ایران کے مرحوم سپریم لیڈر کی میت عراق میں آخری رسومات کے سلسلے میں موجود تھی۔ پاسدارانِ انقلاب نے دوٹوک مؤقف اختیار کیا ہے کہ ایران آبنائے ہرمز میں کسی بھی قسم کی امریکی مداخلت کو برداشت نہیں کرے گا اور ان حملوں کا منہ توڑ جواب دیا جائے گا۔

ایرانی مشترکہ فوجی کمان کے بیان میں مزید کہا گیا کہ امریکا کو آبنائے ہرمز کے انتظام میں کسی مداخلت کی اجازت نہیں دی جائے گی۔ ہرمز میں تجارتی جہازوں اور تیل بردار ٹینکروں کے لیے محفوظ راستہ صرف وہی ہوگا جس کا تعین خود ایران کرے گا۔

واضح رہے کہ اس سے قبل امریکی فوج نے جنوبی ایران میں کھلی جارحیت کا مظاہرہ کرتے ہوئے 80 سے زائد اہداف پر شدید بمباری کی، جس میں جزیرہ سرک، بندر عباس اور قشم کو نشانہ بنایا گیا، ان حملوں میں کئی افراد کے زخمی ہونے کی اطلاعات ہیں۔ امریکی حکام کے مطابق ان حملوں میں ایران کے فضائی دفاعی نظام، سرویلنس سسٹم، اینٹی شپ کروز میزائلوں، ڈرونز تنصیبات اور پاسدارانِ انقلاب کی عسکری کشتیوں کو نشانہ بنایا گیا ہے