غنڈہ گردی اور بھتہ خوری کا دور ختم ہو چکا، جھکیں گے نہیں: سپیکر ایرانی پارلیمنٹ

ایران کے چیف مذاکرات کار اور ایرانی پارلیمنٹ کے اسپیکر محمد باقر قالیباف نے ایران پر حالیہ امریکی حملوں پر شدید ردعمل دیتے ہوئے کہا ہے کہ اب دنیا میں غنڈہ گردی اور بھتہ خوری کا دور ختم ہو چکا ہے، ایران کسی کے سامنے نہیں جھکے گا۔

محمد باقر قالیباف نے امریکا پر دونوں ممالک کے درمیان طے شدہ مفاہمتی یادداشت کی سنگین خلاف ورزیوں کا الزام عائد کیا۔ انہوں نے کہا کہ ایران کے اندر امریکی فوجی حملے، ایرانی تیل کی برآمدات پر دوبارہ پابندیاں، مزید کارروائیوں کی دھمکیاں، آبنائے ہرمز میں ایران کے قانونی اقدامات کی مخالفت اور لبنان کے خلاف اسرائیل کے مسلسل حملے اس مفاہمتی یادداشت کی کھلی خلاف ورزی ہیں۔

دوسری جانب، ایران کے نائب وزیرِ خارجہ کاظم غریب آبادی نے بھی اپنے ایک بیان میں واضح کیا کہ ایرانی تیل کی برآمدات پر پابندی سے استثنیٰ ختم کرنا ‘اسلام آباد مفاہمتی یادداشت’ کے آرٹیکل 10 کی صریح خلاف ورزی ہے۔ انہوں نے مزید کہا کہ ایران کے خلاف امریکی عسکری کارروائیاں معاہدے کے آرٹیکل 1 اور 2 سے متصادم ہیں، جبکہ گزشتہ 3 ہفتوں کے دوران لبنان میں اسرائیلی اقدامات کی امریکی سرپرستی اور تہران کے خلاف دھمکی آمیز بیانات بھی معاہدے سے صریح انحراف ہیں۔

کاظم غریب آبادی کا کہنا تھا کہ ایران واشنگٹن کو ان خلاف ورزیوں کے سنگین نتائج سے مسلسل آگاہ کر رہا ہے۔ انہوں نے عزم ظاہر کیا کہ ایران اپنے قومی مفادات اور سلامتی کے تحفظ کے لیے فیصلہ کن اقدامات کرے گا، اور ہم امریکا سے مطالبہ کرتے ہیں کہ وہ معاہدے کی تمام شقوں پر فوری اور مکمل عمل درآمد کو یقینی بنائے۔