پاسداران انقلاب کا 85 امریکی فوجی تنصیبات کو نشانہ بنانے کا دعویٰ

ایران کے پاسدارانِ انقلاب (IRGC) نے دعویٰ کیا ہے کہ انہوں نے امریکی فوجی کارروائیوں کے جواب میں بحرین اور کویت میں قائم امریکی عسکری تنصیبات پر 85 مقامات کو کامیابی سے نشانہ بنایا ہے۔

پاسدارانِ انقلاب کی جانب سے جاری کردہ باضابطہ بیان کے مطابق، اس مشترکہ میزائل اور ڈرون کارروائی میں بحرین میں قائم امریکی بحریہ کے پانچویں بحری بیڑے (5th Fleet) کے مرکز ‘پورٹ سلمان’ اور کویت میں واقع ‘علی السالم فضائی اڈے’ سمیت 85 اہم امریکی فوجی تنصیبات کو شدید نقصان پہنچایا گیا ہے۔ اس کے علاوہ ایرانی فورسز نے ایک امریکی ‘ایم کیو نائن’ (MQ-9) ڈرون طیارہ مار گرانے کا دعویٰ بھی کیا ہے۔

ایرانی بیان میں واضح کیا گیا ہے کہ یہ کارروائی امریکا کی جانب سے جنگ بندی اور ‘اسلام آباد معاہدے’ کی خلاف ورزی کے جواب میں ایک ’ابتدائی ردعمل‘ ہے۔ پاسدارانِ انقلاب کا کہنا ہے کہ سابق ایرانی رہبرِ اعلیٰ کی تدفین میں عوام کی غیر معمولی شرکت کے بعد امریکا نے ایک بار پھر معاہدے کی خلاف ورزی کی اور آج علی الصبح ایران کے علاقوں ہرمزگان اور ماہشہر کے ساحلی حصوں میں بعض فوجی اڈوں اور غیر فوجی مراکز پر فضائی حملے کیے۔

یاد رہے کہ اس سے قبل امریکی فوج کی مرکزی کمان (CENTCOM) کی جانب سے ایران کے اندر 80 سے زیادہ اہداف کو نشانہ بنانے کا اعلان کیا گیا تھا، جس کے بعد اب ایران کی طرف سے یہ بڑی جوابی کارروائی سامنے آئی ہے۔