ہم صرف ایک نتھنے سے ہی سانس کیوں لیتے ہیں؟ اس اسرار کا راز جانیں

کیا آپ نے کبھی غور کیا ہے کہ عام حالات میں سانس لیتے وقت ایک وقت میں ایک نتھنا زیادہ فعال ہوتا ہے؟ یہ دراصل انسانی جسم کا ایک قدرتی اور خودکار عمل ہے جسے نیزل سائیکل (Nasal Cycle) کہا جاتا ہے۔

اگر آپ گہری سانس لے کر غور کریں تو محسوس ہوگا کہ ایک نتھنا زیادہ کھلا ہوتا ہے جبکہ دوسرے سے ہوا کا بہاؤ نسبتاً کم ہوتا ہے۔ یہ کوئی بیماری نہیں بلکہ جسم کا معمول کا نظام ہے جو دن بھر میں کئی مرتبہ خود بخود تبدیل ہوتا رہتا ہے۔

ماہرین کے مطابق جب ہم بیدار ہوتے ہیں تو عموماً ہر دو گھنٹے بعد سانس لینے والا نتھنا تبدیل ہو جاتا ہے، جبکہ نیند کے دوران یہ عمل نسبتاً کم ہو جاتا ہے کیونکہ اس وقت سانس لینے کی رفتار کم ہوتی ہے۔

اس عمل کے دوران ایک نتھنے میں ہوا کا بہاؤ کم ہو جاتا ہے جبکہ دوسرا نتھنا زیادہ کھل جاتا ہے اور زیادہ ہوا وہاں سے گزرنے لگتی ہے۔ وقت کے ساتھ ہوا خشک ہونے اور جراثیم ناک کے خلیات سے ٹکرانے لگتے ہیں تو جسم سانس لینے والا نتھنا تبدیل کر دیتا ہے۔

ماہرین کا کہنا ہے کہ اس پورے عمل کو دماغ خودکار طور پر کنٹرول کرتا ہے۔ تحقیق کے مطابق جب دایاں نتھنا زیادہ فعال ہوتا ہے تو جسم نسبتاً زیادہ متحرک اور الرٹ ہوتا ہے، جبکہ بائیں نتھنے کے فعال ہونے پر جسم زیادہ پرسکون محسوس کرتا ہے۔

یہ قدرتی نظام ناک اور نظام تنفس کو محفوظ رکھنے میں اہم کردار ادا کرتا ہے کیونکہ انسان کے جسم سے روزانہ تقریباً 12 ہزار لیٹر ہوا گزرتی ہے۔ اس عمل سے ناک کو آرام اور مرمت کا موقع ملتا ہے، شریانوں میں خون کا بہاؤ بہتر ہوتا ہے اور نتھنوں میں نمی برقرار رہتی ہے۔