دنیا کی سب سے ’’ دُبلی پتلی کار‘‘، ریکارڈ بُک میں نام درج

اطالوی مکینک اینڈریا مرازی نے دنیا کی سب سے پتلی اور باقاعدہ سڑک پر چلنے والی کار تیار کر کے ایک نیا عالمی ریکارڈ قائم کر دیا ہے، جس کے بعد ان کا نام گنیز بُک آف ورلڈ ریکارڈ میں درج کر لیا گیا ہے۔ عام طور پر تمام گاڑیوں کی چوڑائی میں کچھ حد تک یکسانیت ہوتی ہے، لیکن اینڈریا مرازی کی تیار کردہ یہ انوکھی الیکٹرک کار محض 20 سینٹی میٹر (تقریباً 19.6 انچ) چوڑی ہے، جو ایک عام موٹر سائیکل سے بھی زیادہ تنگ ہے اور اس میں بمشکل صرف ایک ڈرائیور ہی بیٹھ سکتا ہے۔

ٹیکنالوجی کے اس نادر نمونے کی کل لمبائی 145 سینٹی میٹر اور وزن 264 کلوگرام ہے۔ اس گاڑی کو تیار کرنے کے لیے 1993 ماڈل کی معروف ’فیاٹ پانڈا‘ کار کو درمیان سے کاٹ کر اس میں الیکٹرک اسکوٹر کی پاور فل موٹر نصب کی گئی ہے۔ صرف ایک نشست پر مشتمل یہ الیکٹرک کار 15 کلومیٹر فی گھنٹہ کی رفتار سے چلنے کی صلاحیت رکھتی ہے۔ سوشل میڈیا پر اس عجیب و غریب گاڑی کی ویڈیوز تیزی سے وائرل ہو رہی ہیں اور شائقینِ ٹیکنالوجی اطالوی مکینک کی اس انوکھی ایجاد اور صلاحیتوں کو بے حد سراہ رہے ہیں۔