آبنائے ہرمز پر ایران نے فیس عائد کردی، جہازوں سے 20 لاکھ ڈالر وصولی کا دعویٰ

تہران: ایران کی پارلیمنٹ کے رکن علاالدین بروجردی نے انکشاف کیا ہے کہ ایران نے آبنائے ہرمز سے گزرنے والے متعدد جہازوں سے تقریباً 20 لاکھ ڈالر بطور ٹرانزٹ فیس وصول کی ہے۔

ایرانی پارلیمنٹ کی قومی سلامتی و خارجہ پالیسی کمیٹی کے رکن نے ایک ٹی وی پروگرام میں گفتگو کرتے ہوئے کہا کہ ایران نے 47 برس بعد آبنائے ہرمز پر خودمختاری کا ایک نیا تصور قائم کیا ہے، جس کے تحت بعض جہازوں سے گزرنے کے عوض فیس وصول کی جا رہی ہے۔

انہوں نے کہا کہ یہ اقدام ایران کی طاقت اور خطے میں اس کے مؤثر کردار کی عکاسی کرتا ہے۔ ان کا کہنا تھا کہ آبنائے ہرمز عالمی توانائی ترسیل کا ایک اہم راستہ ہے جہاں سے روزانہ تقریباً 2 کروڑ بیرل تیل اور دنیا کی مائع قدرتی گیس کی تجارت کا بڑا حصہ گزرتا ہے۔

واضح رہے کہ مارچ کے آغاز سے ایران نے مؤثر طور پر آبنائے ہرمز کو زیادہ تر جہازوں کے لیے محدود کر دیا ہے، جس کے باعث عالمی شپنگ اور بیمہ اخراجات میں اضافہ ہوا ہے جبکہ تیل کی قیمتیں بھی بڑھ گئی ہیں۔

یہ پیش رفت ایسے وقت میں سامنے آئی ہے جب ایران کو امریکا اور اسرائیل کے حملوں کا سامنا رہا، جس کے نتیجے میں اہم شخصیات سمیت 1300 سے زائد افراد شہید ہو چکے ہیں۔ بعد ازاں ایران نے جوابی کارروائی میں مختلف مقامات پر میزائل اور بغیر پائلٹ طیاروں کے ذریعے حملے کیے، جس سے خطے میں کشیدگی مزید بڑھ گئی ہے۔