کراچی: ہسپتال سے نومولود بچے کے غائب ہونے کا معاملہ، ڈاکٹر کا اہم بیان سامنے آگیا

کراچی کے علاقے ناظم آباد کے نجی ہسپتال میں زچگی کے دوران نومولود کے مبینہ طور پر غائب ہونے کے معاملے پر شعبہ امراضِ نسواں کی سربراہ ڈاکٹر انجم آرا حسن کا ویڈیو بیان سامنے آ گیا ہے۔ ڈاکٹر انجم کے مطابق لیبارٹری اور طبی معائنے کی حتمی رپورٹس سے یہ ثابت ہو چکا ہے کہ خاتون سرے سے حاملہ ہی نہیں تھیں۔ انہوں نے بتایا کہ مریضہ رواں سال فروری میں پہلی بار آئی تھیں اور تب بھی الٹرا ساؤنڈ میں ان کے حاملہ ہونے کی رپورٹ منفی آئی تھی، تاہم مریضہ نے کسی دوسرے ہسپتال کی رپورٹ دکھائی جس میں انہیں حاملہ ظاہر کیا گیا تھا اور ان کی فائل میں درج بعض اندراجات بھی جعلی پائے گئے۔ ہسپتال کی سربراہ کے مطابق ایمرجنسی میں ڈیوٹی ڈاکٹر نے رپورٹ کے پیش نظر آپریشن کا فیصلہ کیا، تاہم آپریشن کے بعد انکشاف ہوا کہ خاتون کے ہاں کوئی زچگی نہیں ہونی تھی، جس کی تصدیق قانونی اور طبی رپورٹس نے بھی کر دی ہے۔